Luke 18

La Hohin Yi

1Nwyihoi Yesu wa gna owa bara nabari ho n nabai wa wuɓa ge ɓa zhin aduwa cici. Har ɓa bwa amsa.

2Wacige, “Alkali ho ɓei nyi n ezhi ho, To woi kpe Shekwoyi ye m, njesun to woi gye oza ntukwoi tu m. 3Nyigbayi ho wa gna wo gna-gna ntuge wa dawo wa n zahoi n wo ɓei gyi wo fi. 4– 5To Alkali yi wa gye wo ngye nya ho m. Amma nyikwoza yi woi ɓe cici. N sayi Alkali yi wa cige Koda shike niita wo Shekwoyi dna m, ko gbagyi za m. Dole ma da nyikwoye wa dai-dai gama wola gna mi gna-gna.

6– 7“Nsayi Yesu wa ciɓa ge, ngye alkaliye pya ɓa zhin lai, fye ta kpe ge Shekwoyi ɓa zhin owo aɓi daidai, nɓa gyi wo wye n sukwoyi ɓedo n nyipyeyi ko? 8Eh, wo ɓa woɓa aduwa npye-pyeyi, amma sanu mi (oza nugun) ɓei jezeɓe mi ɓei gye aza nyi n gaiciya ga yi nsun na (ɓai zhin aduwa?)” 9Nsayi wa gna azaho nabari ye, nɓa ɓei zhi ɓai zhin aɓoko ge, ɓa zhin aza gyi-gyi-yi nu.

10“Wa cige, aza ngun aba ɓei lo aduwa nyakun, ntuge ɓo zhin aduwa. Zaknayi ɓei zhin Farisiyi nu, oza bayi kwa ɓei zhin godu goyi nu.

11“Farisiyi aɓokwo da wacige, ‘Ma gode n hoi Shekwoyi ntuge mi to zhin laifi da nu ngye godu goyi ye m. Gama mitagyi oza fi m, mi ta zhin anyikwo ɓo m. 12Mi zhin azumi abwa ngun aba dna n mako. Njesun mi zhin ma ga Shekwoyi zakka.’

13“Amma godu gwoyi wa gni n kpayi, to wa ye ge wa zhin aɓokwo m. Amma wa lu agu n bugbawun yi, wa cige, ‘Shekwoyi, gye mi sun-sun gama mi zhin laifi da nu.’ 14To, ma gnafye laifi da yi ɓei la lo api n gafara yi, amma Farisiyi to ɓei bwa m. Gama oza n wo zhin aɓoko a ɓa gba wo amma oza n wo gba wohin aɓa gawo mwa-mwa.”

15Nwyihoi azaho ɓa ɓe n aɓi yi n Yesu aba, ntu ge wa pe ɓa bwa wa tu ɓa anabarka. Amma Yesu abara ɓa ci azayi ge ɓa la kuka.

16– 17Nsayi Yesu wa yi aɓi yi nge ɓa ɓe. Wa ci owo abara ge, “Fye fa aɓi nawyi ɓa ɓe mi aba. Fye to nyaɓaya m. Gama Shekwoyi ebemi zhin aza nya nu n ɓa gaiciya ngye aɓi nyi. Ozaho-zahoi n wo to ga gaiciya ngye aɓi ye m, wo ta lo Shekwoyi ebemi m.”

Nyabwayi Nwo Aɓo Gna-gnayi

18Nsayi a Yahudiyi malami ho wa nya Yesu ge, “Malami manayi, miɓa zhin wuna ntuge ma bwa wye-wyeyi nyalo-nyalo nya?”

19Yesu waci malami yi ge, “Kni nu zhin hoi yi mi ge, oza manayiʼa? Ai oza to lo n wo zhin oza manayi m, sai Shekwoyi. 20Ho kpe awyidna ye lo: ‘To zhin anagba yi m, to wu oza m. To wyi evi m, to ce akata m, Ga oho dada mwa-mwa ɓedo n oho ya yj.’ ” 21Malami yi wa ci Yesu ge, “Tunyi mi ye bwasun ciwyi miku awyidna ye vi vinya.”

22Sanu Yesu ɓei wo lonu wa ci malami ye ge, “Enya ye hoi celo gmanyi. Lo hoi kun anya vinya n ho cei lo, ha ku agyiwye ga anyamwa yi, hoɓa bwa dukiya n eshe mi nsayi haɓe ha vimi.”

23Amma she malei yi ɓei wo lonu, bugba kwa wo wun gama wo ɓei zhin gyiwye da nu. 24Sanu Yesu ɓe gye bugba la malemi yi wun, wa cige, “Ai kwo dnaɓo n mwa gyiwyeda wa lo Shekwoyi bemi. 25Ko ɓa gna wo fafa Rakumi kwa lo aci bwo a ya cige gyiwye da wo lo Shekwoyi ebe mi.”

26Aza nɓa ɓei wo ɓedaye ɓa cige, “To, nyikado nu ɓa pwoʼa?”

27Yesu wa ciɓa ge, “Enya n ko dna gbagyiza nyikwoci ɓo ge wa zhin kwo ta dna Shekwoyi ɓo m.”

28Nsayi Bitrus wa cige, “To, yiku eyi apuwa fa ntuge ya vi ho.”

29Yesu wa ɓa ge, “Miɓa gnafye gaiciya ozaho-zahoi wa fa wo puwa owoʼya, owo dada, owo amaje, kwo kwa owo ai ntu Shekwoyi bemi ɓo.

30“Wo ɓa bwa anabarka n mwa n anyi ye, njesun wo ɓa bwa wye-wyeyi nyalo-nyalo nya, n anyi de yi n ɓa ɓelo nyi.”

31Nsayi Yesu wa kun owo abara ya zhi wa ci ɓa ge, “Fye kna tnubua. Yilo Urushelima nu anabi doho-dohoi ɓeda n oza nugun tukwo ɓa nu nɓo nu. 32Aɓa gawo n aza kun nɓata kpe Shekwoyi yem, oɓanu ɓa ma wo esan, ɓa kniwo bugba ɓa kni akni kpe wo. 33Ɓa luwo har ɓa wu wo, amma wo ɓei laka n vingwo n nyipyeyi tayi.”

34Owo abara to ɓai gane n enya yi n wo ɓei da m, gama aɓei la okwo awyega bwishi, cenu ɓei zhin to ɓa kpe enya ye n Yesu ɓei gni woi da m. 35Sanu n ɓa ɓei ɓe n zokwo, Yesu wa wo vivi n ezhi hoi ai yiko ge Jerikwo. Wyebuayi ho ɓei sase tu n zokwo gbe woi ɓa nya. 36She wo ɓei wo aza ɓai duya n mwa wa nya ɓo ge, “Kninu zhiʼa?” 37Aza ɓa ciwo ge, “Yesu n wo gmi n Nazarat nyi owo nu duya.” 38Nsayi wa ɓe wyi wacige, “Yesu Dawuda nugun gyemi sun-sun.”

39Aza nɓa ɓei gyi n abye nyi, ɓa ciwo ge wola ce pi. Amma wa gna begye latu n she wa cige, “Dawuda Nugun gyemi sun-sun.”

40Nsayi Yesu wa kpegni wa cige, ayi wyebuayi ge wo ɓe she wo ɓei ɓe Yesu wa nya wo ge: 41“Ho ye ge ma zhin ho kni nuʼa?” Wyebuayi wa cige, “Dagayi mi cei pma ma gye” wyeba njesun.

42Nsai Yesu wa ciwo ge, “Gyewyeba, oho gaiciya ga kola ho ka gna.”

43Nsayi-sayi awye ɓa guwoya bmagyi. Wa vi Yesu woi zhin Shekwoyi godiya. Sanu aza ɓei gye lonu, oɓa vinya ɓa zhin Shekwoyi godiya.